La Banda Gaites La Laguna del Torollu y la Orquesta Sinfónica del Ateneo Musical de Mieres piesllen parte de la programación del FIL con gran éxitu de convocatoria.
La Banda Gaites La Laguna del Torollu y la Orquesta Sinfónica del Ateneo Musical de Mieres, dirixíes por Iñaki Sánchez Santianes, ufiertaron al públicu lorientés el sábadu 17 una amuesa de la saga musical 13 Reyes (parte I), compuesta por Yónatan Sánchez Santianes. Nella faise un percorríu polos reis de la monarquía asturiana dende la batalla de Cuadonga hasta la integración del territoriu na corona de Castiella. Ficiérase yá un estrenu previu nel Festival de la Sidra de Nava.
El conciertu, una de les últimes feches pa la delegación asturiana (que pon el ramu esta nueche colos conciertos de Baxel na Place des Pays celtes y Llevólu’l Sumiciu en Le Kleub) foi acoyíu con gran interés por parte del públicu bretón, yá familiarizáu cola tradición musical asturiana; sicasí, nun podíen esfrutar d’esti formatu dende la participación nel festival de Lisardo Lombardía, que traxera a la OSPA.
El contraste ente instrumentos tradicionales y de la música culta dexó clisáu al públicu, al que pocu-y importó lo temprano de la cita. Amás, el plantegamientu de la obra, interactivu (pidiendo l’ayuda del públicu pa dar palmes o acentos de voz), xunto cola integración de melodíes más conocíes como Xuanín de Mieres o la Muñeira de Tormaleo, dexó con bon regustu a la xente lorientés, qu’afalagó al conxuntu al rematar el recital.
