Entamu LA SIDRA 188 (Agostu’19)

Entamu

Imposible recoyer la cantidá d’eventos que se cellebren nesti mes nos que la sidre ye d’una forma o otra protagonista, y namás cabe destacar la so vitalidá y rixu. Tamién como, per estes feches, el consumu de sidre, especialmente ente la mocedá, ye quien a desplazar a otres bébores que cunten con mayor sofitu publicitariu.

Les fiestes de prau, los merenderos, los concursos de sidre casero, les fiestes de la sidre… acumúlasemos el trabayu a los amantes de la sidre, y por si fuere poco la calidá del productu ye ca vegada mayor, por más qu’en dellos de casos paeza percibise un escesu de sulfitos en dalgún palu, xenerando un ciertu reparu ente los sidreros.

Per otru llau, los pumares tan cargaos y la mazana paez maurecer un poco apriesa coles temperatures; yá tan naguando los pumareros por un pocu d’augua pa rematar lo que s’anuncia como l’avezada collechona de los años impares, nesti país onde la vecería sigue reinando.

Asina mesmo, paez ser qu’el “Principado” por fin presentó en Madrid la candidatura de la cultura sidrera asturiana como Padremuñu de la Humanidá, pa qu’el Reinu d’España pueda proponela a la Unesco. Paez ser, porque tampoco nun hai denguna confirmación nidia de cuala ye la situación agora mesmo. Eso sí, nel meyor de los casos, dempués d’once años de retrasu les condiciones p’algamar esta reconocencia son ca vegada más terries, y si los qu’entamaron al empar que s’anunció la candidatura de la cultura sidrera asturiana yá va años que lo algamaron, nel casu asturianu tovía va avagamos.

El desenfotu del “Principado” en tou esti procesu ta suponiéndomos un perxuiciu nel tarrén cultural, pero tamién económicu, afeutando perespacialmente al conxuntu del seutor sidreru y al turísticu en xeneral.

Acaba esti mes cola Fiesta de la Sidre xixonesa, qu’esti añu presentóse con cambios daqué polémicos, pero que como nun podía ser d’otra miente, ca añu va a más; y yá s’anuncia la de Villaviciosa pal entamu de setiembre, y el IX SISGA pa la postrer selmana d’esi mes.

Vamos bien d’eventos sidreros, y seguimos a meyor.

VER REVISTA