El CIFP d’Hostelería y Turismu d’Asturies en Xixón abre güei l’espaciu nel que ta previstu que s’ufierte’l certificáu de ‘Camareru en sidrería’
LA SIDRA.- Ye una de les naguraciones más esperaes nel mundiu la sidre y de la formación pal so serviciu. El Centru Integráu de Formación Profesional d’Hostelería y Turismu, asitiáu en Xixón, atópase trabayando dende fai más de dos años y mediu nunes certificaciones específiques de profesionalidá de ‘Camareru en sidrería’ y de ‘Maestru en Sidra’. Un procesu complexu yá que tien de ser aprobáu pol SEPEPA, polo que los estudios deben de tar correchamente planiaos y argumentaos.
Únde los requisitos ye cuntar con un espaciu afayaízu. Por esta sida, el centru tuvo trabayando na adecuación d’una Aula de Sidrería’ onde los alunos van poder deprender tolo rellacionao col serviciu del nuesu productu más emblemáticu, pero tamién van llograr conocencies sobro la so hestoria, cultura, ellaboración, analís, cualidaes organolépticas, etc.
“Los ciclos formativos de servicios en restauración, por llei, establecen que tienen que cuntar con un espaciu específicu pal analís organolépticu de les estremaes tribes de bébores que s’estudien nes degustaciones. Nós cuntábamos yá con un espaciu na escuela, pero que taba un pocu infrautilizáu poles sos carauterístiques de diseñu. Práuticamente utilizábase namás los vienres, pa la vienta de productos del ciclu de panadería-pastelería. Per otru llau teníemos la tema de la sidre y de la tastia. Pos metimos eses trés coses nuna coctelera, ximielguemos y falemos con una la reconocida arquiteuta y diseñadora interiorista Mamen de la Concha y la so fía Carmen (arquiteuta), que fixeron trabayos escelentes n’hoteles, sidreríes, ente munchos más proyectos. Axuntamos y la idega encantóyos. Tengo que dicir que s’implicaron a tolos niveles, dafechu, dende l’económicu fasta l’artísticu. Támos-yos bien agradecíos” señalaba en febreru pa la revista LA SIDRA Juan Luis García, téunicu de FP en servicios de Restauración y xefe d’Estudios del CIFP. Asina, cola inauguración d’esti aula, avánzase un pocu más pa consiguir la buscada certificación, que, espérase, pueda escomenzar a ufiertase cuantu enantes.
Semeya: una parte de l’aula nel centru, el profesor ye Juan Luis García
