¡Yá había ganes! La pasión sidrera teníamos naguando por espicha y xaréu… menos mal que güei entama la Primer Sidre l’Añu y podemos entamar a santificar les fiestes
Güei a la una echaremos el culín nagural d’esta folixa sidrera, declarada de raigañu social pol Conceyu de Xixón -que, nun lo escaezamos, ye pa nos la capital mundial de la sidre-.
L’hestoriador Luis Benito García, impulsor de la candidatura de la Cultura Sidrera Asturiana pal so reconocimientu como Padremuñu Cultural Inmaterial de la Humanidá por parte de la UNESCO, aniciará la Primer Sidre con un pregón de xuro interesante. A la naguración acudirán tamién delles cofradies gastronómiques, colos Sicerátores al frente, el presidente de la Fundación Asturies XXI Marcos Fernández, Jesús Martínez Salvador, conceyal de Turismu, esportes, Festexos y Mocedá de Xixón, ya’l llagareru Alfonso Prado, de La Morena.
El Muséu del Pueblu d’Asturies, en Xixón, sedrá comu tolos años ¡y ya van diez! l’entornu perfechu, -con techu y tou, pa que nin la lluvia mos apare- nel qu’esfrutar de toa esta sidre y del ampliu programa d’actividaes qu’ufre la PSLA.
Allí toparemos la sidre d’alrodiu 70 llagares, prepará ya pa que la tastiemos, la comparemos y calibremos comu vien l’añu en cuestión sidrera. Tendremos tamién a los esforciaos echaores, apurriéndonos culinos comu llocos, y a les pipes d’autoserviciu en so puntu pa los más apurones. Los virusos podrán tastiar dalguna sidre de les de gala y los que presuman de cosmopolites, que busquen la sidre d’otros países. Nun mos escaecemos de los que nun beben alcohol: pa ellos, sidre 0,0 y sidre dolce.
Esti añu la estrella pente les sidres ye Prado y Pedregal, del llagar La Morena, la meyor Primer Sidre l’Añu del 2019- Animámosvos a dir a prebar, a ver si ye verdá que ta meyor que les otres.
Pero como non tou ye beber, tendremos tamién al equipu de cocina dándolo too, cola parrilla a tope ya’l menú vexetarianu, según los gustos, a los músicos poniendo ambiente a la folixa, los ballarines blincando comu campiones, los esportistes tradicionales xugando y deprendiendo a quien s’arrime, los Sidrocoles faciendo cola reciella sidre’n direutu, los xuegos… actividaes, tasties y talleres pa toles edaes y a toles hores, y tou eso por solo 6 euros… un chollazu, vamos.
Eso si, la PSLA preslla a les diez, pero nun vos esmolezais, que nos chigres de Xixón sigui habiendo sidre asgaya, polo que vos convidamos a consultar el Mapa de chigres de Xixón.
¡Bebi con xacíu! Anque la llexislación española entá nun lo desixa, asumimos los principios europeos nos que l’anunciu d’actividaes rellacionaes col alcol tienen de llevar un llamamientu al so consumu responsable y moderao, de tala miente que l’eslogan “Bebi con xacíu. Ye la nuesa cultura. Ye la to responsabilidá” tará presente en tol eventu, remembrando de pasu que la cultura asturiana de la sidre nun ye una cultura de “borrachera”, sinon de rellaciones sociales.
