Entamu LA SIDRA 180 (Avientu’18)

Entamu

Nestes feches de cellebración navidiega, la sidre asturiana pasa un auténticu desáme. ¿Sedrá a tar nes meses de los asturianos nel llugar y el posicionamientu que-y correspuende? Esto afeuta a la sidre natural y l’axampanada de tola vida, pero sobro too a les nueves formes nes que foi evolucionando nestos postreros años. ¿La sidre brut presidirá les meses en cuentes del xampán o’l caba? ¿Habrá espaciu pa les sidres de xelu, los llicores de sidre, l’auguardiente de sidre?

Ye una preba importante, porque si queremos qu’estos productos tean futuro y proyeición esterior ye preciso que primero seyan asumíos como propios polos asturianos, y que se-yos reconoza, en casa precisamente, el valor y la calidá de los mesmos.

Ye cierto que pasu ente pasu va consiguiéndose que les nueves espresiones de la sidre s’integren como parte de la nuesa cultura sidrera, y seyan consideraes como la evolución llóxica de la nuesa sidre tradicional. Pero curiáu, porque tan pelligroso resulta identidá ensin evolución como evolución ensin indentidá, y si les nueves sidres asturianes defínense como Spanish Cider, que nun-y choque a naide si llueu los asturianos nun les idenrificamos como propies. ¡Nós, que dende’l sieglu XIX llevamos esportando sidre per mediu mundiu col marchamu de Sidra Asturiana!

Per otra parte, finamos l’añu como llevamos finando tantos otros, ensin solucionar el problema de la mazana; cuando nun sobra, falta, y la importación de mazana y mostios estabilizaos de toa Europa acaba siendo norma.

Ye cierto que nos tiempos caberos ca vegada tómase con más seriedá esta custión, tanto polo pumareros como polos llagareros, y que la mesma esistencia de la DOP Sidre d’Asturies contribuyó a reivindicar la mazana asturiana y la importancia del so cultivu, pero queda muncha xera.

Precisamente por eso tenemos que felicitamos, porque paez que por fin el “Principado” asumió la necesidá de rializar un Plan Estratéxicu de la Sidre y la Mazana, porque esi Plan va aidar a meyorar la situación, anque namás seya porque por fin sabremos cuanta mazana y cuanta sidre se produz, y porque les polítiques al respeutu sedrán conocíes y los sos resultaos podrán ser evaluaos, y con ello espérase que les “ocurrencies” y les redes clientelares istitucionales puedan ser controlaes.
En cualisquier casu, dende LA SIDRA queremos faer un brinde a tolos nuesos llectores, amigos y collaboraores, y queremos faelo cola nuesa sidre. ¡¡Felices Fiestes y prósperu añu 2019!!

VER REVISTA