Inicio > Sin categoría > Un nuevu colleutivu en defensa de la mazana asturiana
Sin categoría

Un nuevu colleutivu en defensa de la mazana asturiana

Naz en Villaviciosa l'”Asamblea de Collecheros de la Mazana de la Comarca la Sidre y Contorna”

LA SIDRA.- Los collecheros independientes echáronse una vegada más a la cai’l domingu pa reivindicar la compra de les sos mazanes per parte de los llagareros.

So los lemas “Vendei la sidre a quien-yos mercáis les mazanes” o “La vecería nun ye el problema, ye la disculpa de la Conseyería”, más de mediu centenar de presones axuntáronse en Villaviciosa p’aniciar un colleutivu que llogre asitiar les 500 tonelaes d’escedente de mazana esti añu.

Jose Luis Álvarez, voceru de l’asamblea, solicitó que’l “Principado” tome midíes, yá que se ta perdiendo fasta la mazana utilizada pa la DOP y reclama’l sofitu tantu d’hosteleros como comerciantes. Y que, al igual que se subvencionaron los llantíos, sofítese tamién el caltenimientu de les pumaraes.

Consideren que la mazana trayía de fora d’Asturies ye más barata, pero de peor calidá, polo qu’aportunen nun etiquetáu de les botelles qu’especifique’l porcentaxe de mazana asturiano que contienen, daqué yá refugáu pol “Principado”.

L’oxetivu de l’asociación ye defender la vienta total de mazana esti añu y aldericar propuestes col fin de ser más competitivos.

Los collecheros independientes anunciaron una nueva movilización esti miércoles frente a la Casa Conceyu de Villaviciosa.

Ana María Viciosa
http://www.lasidra.as
Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d'inglés, guía ya intérprete y traductora. Ye una gran aficionada a la sidre y al bon xintar.