Inicio > Eventos > Sidra Riestra y Viesk distinguíes nel Sagardo Forum
EventosInternacionalTasties

Sidra Riestra y Viesk distinguíes nel Sagardo Forum

El Concursu Internacional de Sidre punxo puntu final a estes xornaes sidreres.

LA SIDRA.- Ayeri finó n’Hernani estes xornaes téuniques dedicaes a la mazana, a los sos derivaos y a la cultura y turismu de la sidre que tuvieron llugar del 23 al 25 d’esti mes.

Na primer xornada les conferencies tuvieron enfocaes al cultivu de la mazana y a la produición de la sidre, atendiendo a los aspeutos már téunicos rellacionaos col seutor primariu, y ente los sos ponentes tuvo Daniel Gallinal, de la pumarada del mesmu nome en Llanera, que faló sobro la esperiencia na so pumarada.

Demientres la segunda xornada, el Sagardo Forum centróse nes esperiencies gastronómiques y el turismu de la sidre, nesti casu la presencia asturiana tuvo a cargu de Marta García, del Llagar Castañón, y Begoña Medio,  xerente de la consultoría turística Bmedio

En cuantes al Concursu de Sidre, (qu’anque yera internacional tenía categoríes independientes según la procedencia, de tala miente que la sidre asturiano “competía” únicamente ente sigo) destacar el trunfu de Sidra Riestra como meyor sidre natural asturiana presentao, siendo toes elles premiaes -9 con medalla de plata y 6 de bronce-.

Y ye que dientru de ca categoría territorial les medalles otorgábense en función de la puntuación del xuráu y l’aportación económica del llagar, de tala miente que’l númberu medalles posibles yera indefiníu.

Asina mesmo Sidre Viesk, del llagar Panizales, foi distinguía con un premiu d’honor fuera de categoría, y la sidra “Boskop” de Weidmann & Groh Gbr-en  (Alemaña) ganó’l premiu “Best of show” por ser la más destacada del concursu.