Inicio > Internacional > Puristes escontra la denominación “sidre de pera”
Internacional

Puristes escontra la denominación “sidre de pera”

L’etiquetáu d’esti productu enoxa a los tradicionalistes en Reinu Xuníu.

LA SIDRA.- L’ésitu de les sidres ellaboraes por Bulmers, Magners y Kopparberg ente otros, llevó a alderique si l’etiquetáu de los sos produtos como “sidre de pera” tien de permitiese o non.

Esta denominación fadió a los tradicionalistes de la Campaña pola Auténtica Ale (CAMRA), que cunten que la sidre faise namá con mazanes, mentes que “perry” -perea n’asturianu- tien de ser el nome que s’utilice coles bébores alcóliques de pera.

Acordies con Gillian Williams, del comité de campañes de CAMRA, la sidre y el “perry” fueron una tradición británica mientres abargana de 1.000 años y ta mal llamar a otres bébores “sidre de pera”. La braera sidre y el perry tienen una graduación ente 6% y 8,5%, mentes que la mayoría d’estes bébores esplumoses tienen alrodiu de 4%. Tamién argumenten que la braera sidre tien de contener siquier un 90% de zusmiu frescu de mazana.

Pela so parte, l’Asociación Nacional de Produtores de Sidre (NACM) del Reinu Xuníu, caltien que los fabricantes de bébores nun faen ná malu al etiquetar los sos productos como “sidre de pera”. A efeutos fiscales una sidre o un “perry” tienen de contener un mínimu d’un 35% de zusmiu de mazana o pera como productu final. Argumenten que nun hai diferencia entre “perry” y “sidre de pera” na forma en que se producen o se graven. Si la industria cree qu’esi ye’l meyor nome pa desplicar a los sos consumidores lo que tán bebiendo, nun tendría d’haber dengún problema.

Ana María Viciosa
http://www.lasidra.as

Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d’inglés, guía ya intérprete y traductora. Ye una gran aficionada a la sidre y al bon xintar.