Inicio > Internacional > Muséu de la Sidre d’Hereford
InternacionalSidreturismu

Muséu de la Sidre d’Hereford

El muséu ta asitiáu nun antiguu llagar en Pomona Presta, Hereford, Inglaterra.

LA SIDRA.- Les pumaraes son una manera de vida en Herefordshire, una preciada parte del so paisaxe, y equí ye onde ún pue atopar tou un mundiu rellacionáu cola sidre.

Foi ésta’l trubiecu de la sidre Bulmer’s. Henry Percival Bulmer escomenzó a ellaborar sidre en 1887 y un añu dempués mercó un tarrén pela rodiada de Hereford pa costruyir unu “chabolu” onde faer y almacenar sidre. Darréu escaváronse amplies bodegues y l’edificiu amplióse pa incorporar tantu la fábrica como les oficines.

El Muséu de la Sidre de Hereford fundóse en 1973 pa caltener la hestoria de la ellaboración de sidre nel mundiu. La so estensa colleición inclúi llagares, prenses, botelles, vieyes semeyes, acuareles, anuncios de colleición, oxetos acomuñaos a la hestoria de la ellaboración de sidre y una escepcional colleición de copes de sidre inglés de cristal plomáu.

El Muséu de la Sidre ta enfocáu a ispirar y educar al públicu no que cinca al pasáu, presente y futuru de la industria de la sidre de mazana y perea por aciu del cuidu ya interpretación de la cultura material y el padremuñu de la industria.

L’Archivu de la Pomoloxía de la Sidre ta patrocináu pol’Asociación Nacional de Llagareros y ufierta un depositariu central de documentos, llibros, imaxes, mapes y narraciones orales. Ufierta medios de gueta sobro temes qu’inclúin el llantíu y produición de sidre y perea.

El muséu entama un programa d’eventos a lo llargo l’añu qu’inclúi cursos práuticos de mayáu de mazana demientres la temporada de collecha. La so tienda viende un ampliu abanicu de sidres y productos rellacionaos, como llibros especiallizaos.

Ana María Viciosa
http://www.lasidra.as

Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d’inglés, guía ya intérprete y traductora. Ye una gran aficionada a la sidre y al bon xintar.