Inicio > Llagares > Los llagares sofiten a los pumareros
Llagares

Los llagares sofiten a los pumareros

El Gaiteru y Cortina, decidíos a dar salida a la collechona.

LA SIDRA.- L’escesu de produición de mazana d’esti añu paez tener visos de resolvese. Dellos llagareros de Villaviciosa decidiéronse aidar a los collecheros énte una situación desesperante y llarao de protestes.

Ente ellos atópase El Gaiteru, que decidió collaborar afayando una bodega adicional p’acoyer l’escedente de mazana. En pallabres de la so direutora, María Cardín, la responsabilidá y compromisu col seutor sidreru son valores fundacionales de la so empresa. Ésta empicipió va dos años, mercando mazana a pumareros que nun yeren los avezaos y esti añu van siguir faciéndolo mientres puedan.

El resultáu  ye un 50% más mayao qu’en 2015 y l’agradecimientu de los pumareros por saber responder a les necesidaes derivaes d’una collecha estraordinaria como la d’esti añu.

El llagar Cortina, pela so parte, decidió aidar afayando nuevos depósitos p’ampliar la so capacidá, según ponese en contautu con pumareros cola fin de merca-yos la mazana.

L’alcalde de Villaviciosa, Alejandro Vega, considera que’l diálogu ye la meyor solución pa encarar problemes como los xeneraos por un escesu de produición, especialmente cuandu’l “Principado” sigue dexando n’evidencia la so falta d’interés y capacidá.

Pela so parte, los pumareros de la fastera siguen decidíos a aniciar una asociación que-yos permita encarar esti tipu de problemes y lluchar escontra la vecería.

Ana María Viciosa
http://www.lasidra.as

Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d’inglés, guía ya intérprete y traductora. Ye una gran aficionada a la sidre y al bon xintar.