Los escolinos d’un colexu de Lluanco deprenden a ellaborar sidre.
LA SIDRA.- Los escolinos del colexu públicu La Vallina aparcaron los llibros per unes hores pa deprender a mayar mazana demientres l’amagüestu cellebráu’l xueves, nel que nun faltaron la sidre’l duernu y les castañes.
Afatiaos col traxe asturianu o con monteres picones realizaes con cartulines negra, azul y mariella, entamó una xornada distinta a les avezaes y basada na tradición asturiana.
A lo llargu’l díi, los escolinos deprendieron la ellaboración de la sidre, dende’l mayáu fasta’l so tresformamientu en mostiu.
So la sollerte mirada de los sos pas y d’un profesional que-yos indicaba cómo realizar el procesu de forma correcha, los neños coyeron los mayos de maera pa empicipiar a mayar la mazana, darréu prensala y tastiala a la fin del díi.
Pa acompangar la sidre’l duernu acabante d’ellaborar, y dempués de la llectura del pregón per parte del alunáu d’asturianu, nun faltaron les castañes, anque les condiciones meteorolóxiques atípiques d’esti añu tornáronles nun frutu escasu y difícil d’atopar.
Finalmente, despidieron la xornada col tradicional baille asturianu: la danza prima.
Estes xornaes van llevase a cabu na mayoría los centros educativos del país a lo llargo’l mes de payares.
