Inicio > Eventos > LA SIDRA en Sicera 2017
EventosInternacionalSidreturismuTasties

LA SIDRA en Sicera 2017

Una dellegación de la revista LA SIDRA y la Fundación Asturies XXI, lleva la Sidre d’Asturies al Matterhorn

LA SIDRA.- Esti añu Sicera, la Conferencia de la Sidre d’Italia, que se cellebrará mañana y pasao llega enllena d’actividaes. Col Matterhorn-Monte Cervino, nos Alpes, como telón de fondu, reuniránse espertos d’estremaos países europeos productores de sidres. La Fundación Asturies XXI y la revista LA SIDRA participarán n’ella, faciendo de la Sidre d’Asturies DOP la nuesa embaxaora, y Donato Xuaquín Villoria participará con una ponencia na mesma.

La presentación tendrá llugar na mítica y pelligrosa montaña del Matterhorn-Monte Cervino, concretamente nel Abellugu Teodulo de la Seición Torinesa de la Sociedá Alpina Italiana, a 3.317 m d’altitú, na llende d’Italia con Suiza y na base mesma de l’ascensión a la cume.  L’actu consistirá nuna tastia de les sidres internacionales que tarán presentes na nueva edición de la Mele Vallée, entamada pol Ayuntamientu d’Antey-Saint-André y, poles carauterístiques del llugar, orientada a la prensa especializada italiana nel campu de la enoloxía y la gastronomía.

Ellí ufriráse pa la so degustación una amuesa de les meyores sidres de tol continente européu, nun actu únicu pol so asitiamientu, pos nun hai dengún eventu sidreru que se rializara fasta agora nun enclave paecíu d’alta montaña y a esa altitú.

Y por supuestu, ellí tará representada la meyor sidre asturiano coles tres marques de sidre que na postrer collecha foren declaraes como sidre istitucional de la DOP Sidre d’Asturies, la sidre natural Prado y Pedregal, del Llagar La Morena, la sidre natural calistrao Españar del llagar El Gobernador y la brut Pomarina del llagar El Gaitero.

Fasta ellí desplazaráse tamién, como nos postreros años, una dellegación de LA SIDRA, cuyos miembros tornarán a encargase de facer la presentación de la sidre dela DOP Sidre d’Asturies a los asistentes a la Fiesta y Mercáu de Seronda del pueblu d’Antey-Saint-André. Nesta ocasión, tamién d’averase col grupu alpín fasta la base del Matterhorn-Monte Cervino pa facer la presentación profesional a los miembros de la prensa especializao.

Dexa una rempuesta

La so direición d'email nun sedrá espublizada Campos obligatorios marcaos con *