Les tasties guiaes de sidre rializaes demientres la Primer Sidre l'Añu tovieren un ampliu seguimientu por parte los asistentes, de tala miente que foi preciso llimitar la entrada a les mesmes.
Una de les carauterístiques más sinificatives d'esta Primer Sidre l'Añu foi l'interés que xeneraren les tasties guiaes de sidre, lo qu'amuesa un importante esmolecimientu social por conocer más y meyor les carauterístiques de la sidre, tantu de la sidre "natural" comu d'otres espresiones de la mesma (brut, de mesa, auguardientes...) o inclusu d'otres sidres, comu ye'l casu de la sidre alemana a cuya tastia guiada hebio que llimitar el númberu d'asistentes.
Les tasties guiaes entamaron de la man de Samuel M. Trabanco que presentó la so Sidre d'Escoyeta del presente añu (collecha 2010) y siguió cola presentación en díis sucesivos de Sidre JR pol llagareru Juan José Tomás, y de Sidre Canal, guiada por Joaquín Fernández.
Peles tardis tovieron llugar les tasties de sidres esplumoses, sidres de mesa, auguardientes de sidre y sidre alemana, a cargu de Manuel G. Busto y de Donato X. Villoria, toes les cuales cuntaren con un ampliu seguimientu.
Les semeyes son xentileza del nuesu collaboraor Lujó Semeyes
