LA SIDRA tará nes Xornaes X Aniversariu de la Sidre d’Escoyeta
La ca vegada mayor vitalidá de la cultura sidrera nesti País tá amosada con continues actividaes comu les Xornaes X Aniversariu de la Sidre de Mazana Seleicionada (Sidre d’Escoyeta), que se van a cellebrar na cai Gascona d’Uviéu, ente los díes llunes 4 y vienres 8 d’abril.
Y d’alcuerdu colos nueso vezos y costumes, ehí tará LA SIDRA pa cubrir l’eventu, del cual va facese una crónica y una galería de semeyes pal númberu d’abril.
La naguración d'estes Xornaes sedrá’l llunes 4, de magar les 12:00 hores, coincidiendo amás col actu de Presentación de la Collecha 2010 de la Sidre d’Escoyeta, que cuenta col aval d'un sellu de garantía de calidá y ta calificada con una nota mínima de Notable na Mesa de Tastia cellebrada'l pasáu llunes 21.
Del martes al vienres, van cellebrase tasties guiaes de caúna de les marques ellaboraores de Sidre d’Escoyeta. Sedrán espertos tastiaores y los mesmos llagareros los que dirixan estes tasties, d'inscripción de baldre pero con aforu llindáu, pa garantizar la correcha cellebración de les mesmes.
Otra de les grandes sorpreses d'esti perinteresante eventu va ser la cellebración diaria del sorteu de cincuenta pases VIP pal I Tour de la Sidre de Seleición, qu'inclúi la visita a pumaraes en plenu floriamientu y el percorríu pelos cuatro llagares de Mazana Seleicionada (Trabanco, Muñiz, Foncueva y Peñón), pa dir conociendo en caún d'ellos les estremaes fases d'ellaboración, tastia y escanciáu de la sidre de calidá.
