Dempués del impresionante ésitu de la primer edición, la Primer Sidre l’Añu nun podía sinón dir a más. Más llagares, más actividaes, más dias y la collaboración de los hosteleros, qu'anguañu van poder ufiertar un menú Primer Sidre l’añu”.
Pero va haber munches más novedaes: edición d'un sellu comemorativu, tasties guiaes, fotomaratón sidreru, distribución de pebíes de pumar, presentaciones de llibros, conferencies, presencia de llagares d'otros países, amuesa de tonelería, grabáu de vasos de sidre, tornéu de bolos, menús de espicha....
El Muséu del Pueblu d’Asturies acueye los próximos 21, 22, 23 y2 4 d'abril l'eventu Primer Sidre l’Añu” entamáu pola Fundación Asturies XXI y la revista LA SIDRA y col que se trata de recuperar y poner en valir la tradición de les espichas de Selmana Santa, que consiste en que nestes feches los llagares –industriales o caseros- abren los toneles cola sidre nuevo y ponenlo a dimposición del públicu.
La sidre ta terminando de faese nos toneles, tomando los sos últimos matices, y nós tamos preparando'l marcu perfechu pa prebar la sidre del 2011, a lo grande. Coincidiendo cola fecha de les espiches tradicionales, vamos prebar la primer sidre salida anguañu de los llagares asturianos en Selmana Santa, abriendo asina la nueva temporada sidrera con un eventu que promete ser una de les cites añales más importantes na redolada de la sidre y que l'añu pasáu, pesia’l clima, foi un auténticu ésitu.
La fórmula va ser la mesma que na anterior edición: polos 5 € d'entrada, los asistentes van tener la oportunidá de prebar sidre de los más de los llagares asturianos. Si l'añu pasáu prometíamos 60 llagares y consiguimos 72, nel 2011 pretendemos algamar los 80, lo que mos consolidará comu'l Festival Sidreru con mayor participación de llagares, con muncha diferencia.
Pero non solo va haber sidre asturiano, anque seya la indiscutible protagonista, sinón que vamos tener la posibilidá de tastiar, comu convidaes, sidres d'otros países: llagares d'Irlanda, Alemaña, Gales, Bretaña.Llión y Galicia yá amosaron el so interés en participar con nós na Primera Sidre l’Añu, yá seya ufiertando los sos productos o incorporándolos a les nueses tasties guiaes, qu'anguañu van ser polo tanto más numberoses y variaes.
P'acompangar a la sidre vamos cuntar con un mercáu de productos agroalimentarios, ente los que destaquen los quesos, de xacíu d'orixe asturianu.Paralelamente a la preba de sidre, y yá que tratamos de ser un espeyu de la cultura tradicional asturiana (indixebrable del consumu de sidre) van desendolcase un gran númberu d'actividaes, comu l'amuesa de tonada II Asturianada y sidre, eshibición de bailles y música del país, cursos d'escanciáu, tasties de sidre, degustación de derivaos de la sidre, esposiciones, amuesa d'artesanía, xuegos tradicionales, esportes autóctonos, esposiciones… Tamién ta prevista la cellebración d'un homenaxe nel que se va reconocer la trayeutoria del monologuista Pandiella y un tornéu de bolos.
Asina mesmu, con motivu del II Certame Agroalimentariu nacional de la Primera Sidre l’Añu va editase un sellu, n'edición llimitada, col cartelu de la convocatoria d'anguañu, sigún la correspondiente etiqueta de sidre. Amás, quien asina lo deseye va poder mercar el vasu oficial col llogotipu del Certame. Una oportunidá perfecta pa tolos colleicionistes. Comu novedá principal d'anguaño presentamos la participación de dellos establecimientos d'hostelería que van disponer d'un menú Primer Sidre” y que mos aidará a caltener la fiesta más allá de los estrictos horarios dexaos pol Certame. Al igual que l'añu pasáu, el Muséu del Pueblu d’Asturies va presllar les sos puertes a los diez en puntu de la nuechi. Entós va ser el momentu perfechu p'averase a una d'estes sidreríes collaboradores, onde vamos poder esfrutar del Menú Especial de la Primer Sidre l’Añu, inspiráu nos productos típicos de les espiches y que, ensin dulda, los nuesos estómados van estimar bonalmente. Na Primer Sidre l’Añu va partise una guía con estes sidreríes participantes y les sos direiciones, por que, dempués de prebar la sidre nel Certame sepamos onde sigue'l bon ambiente. Pa quien quiera inaugurar la temporada sidrera entá más a lo grande, recordamos que'l Xueves Santu LA SIDRA entama tamién el yá tradicional Sidracrucis, nel qu'un autobús va percorrer dellos chigres y llagares asturianos nuna ruta que va durar tol día, con música asturiana y muncha gana de xaréu. Solo pa los/as más atrevíos.
Comments
Un saludo
RSS feed for comments to this post