Frutu de la collaboración énte LA SIDRA y el Cientru Asturianu de La Rioxa. el prósimu 26 de febrero fadrase una tastia de sidre de mesa La Zapica (Buznego), Españar (El Gobernador), Villacubera (Cortina), El Gaitero y Zythos (Herminio).
La sidre asturiano de mesa va ser protagonista'l prósimu sábadu 26 de febreru d'una tastia en La Rioxa, la tierra d'ún de los vinos más conocíos y con mayor prestíu en tol mundu, y ello foi posible gracies a la collaboración caltenida ente la revista La Sidra y el Cientru Asturianu de La Rioxa.
La tastia va tener llugar na see del Centru Asturianu; va presentase sidre de cincu llagares acoyíos a la Denominación d'Orixe Protexía Sidre d'Asturies y alla van allegar profesionales venceyaos al mundiu la enoloxía, la tastia, la produición de vinu de Rioja y l'hostelería, costituyendo una completa representación de los distintos seutores incluyíos nel mundiu de les bébores calidable.
De les conversaciones calteníes colos participantes na tastia cabe destacar una reaición común: la sospresa énte una sidre práuticamente desconocía nesta comunidá autónoma, que xeneralmente la identifica cola sidre natural tradicional, polo que resulta estraña otra sidre como la de Nueva Espresión que se sirve en copa, igual qu'el so vinu blancu.
Merez coles mesmes destacar el precuru manifestáu por estos espertos, pos toos indicaron por igual la so especialidá nel vinu, anque tamién l'interés espertáu pola oportunidá que, dende la revista La Sidra y el Centru Asturianu de La Rioxa, ufiertábase-yos de conocer una nuea bébora como ye la sidre asturiano de mesa, qu'adulces se va faciendo buecu nel mercáu y nes feries internacionales.
Ente los profesionales consultaos confirmaron la so asistencia'l bodegueru César del Ríu, del conceyu de Cordovín, llocalidá famosa polos sos vinos claretes, que consideró especialmente positivu'l calter compartíu de la tastia poles posibilidaes de discutiniu qu'ello supon, y l'enólogu Jairo Fernández Pérez, de les bodegues Pagos del Rey, en Fuenmayor, quien nes sos palabres, y magar esi calter compartíu de la tastia, definió la esperiencia como “na práutica una tastia a ciegues, pos van tratar d'apreciase les cualidaes d'un producto fasta agora desconocíu por nós”.
Y, finalmente, siñalar que per parte del Cientru asturianu de La Rioxa quínxose que la tastia nun se llinde namás a la parte téunica, sinón que sirva tamién pa dar a conocer la sidre de mesa al públicu polo xeneral, cola cellebración d'una tastia popular paralela y na que, coincidiendo col Festival Gastronómicu del Oriciu que se va cellebrar esi mesmu díi, va ufiertar a los asistentes la preba d'estes sidres.
