LaSidra.as

  • Full Screen
  • Wide Screen
  • Narrow Screen
  • Increase font size
  • Default font size
  • Decrease font size
Banner

En defensa de la sidre asturiano

Corréu lleutrónicu Asoleyar PDF

Les grandes referencies hestóriques sobro la tradición sidrera n’Asturies

JOSÉ MARÍA OSORO PRESIDENTE DE L'ASOCIACIÓN DE LLAGAREROS D'ASTURIES

Periódicamente apaecen polémiques ya informaciones alrodiu de la nuesa sidre, el so grau de reconocencia internacional y les consabíes comparances con otres fasteres  de produción sidreres. Dende l'ámbitu sidreru estes cuestiones tomense con un amiestu d'esmolición y cierta perplexidá, másime cuandu se consideren los fuertes llazos d'amistanza y coperación esistentes colos llagareros de munches d'eses fasteres  en supuestu bracéu por absurdes primacíes difícilmente mensurables. ¿Imaxina daquién esti tipu de dialéutica ente Rioja, Xerez y Ribera del Dueru o Burdeos?, ¿cuala d'eses zones ye la patria del vinu?, ¿qué vinu ye meyor?... Ciertu ye que la pasión qu'espresen munchos consumidores asturianos, defensores de la sidre, damos bona amuesa de lo qu'el nuesu productu ye pa toos ellos: una auténtica seña d'identidá, un productu totémicu y crisol d'asturianía. El nuesu colleutivu estima'l respaldu y el sofitu que recibe la sidre y cuantu l’arrodia, ensin dulda, la clave del ésitu d'una bébora tres la cual hai munches families, esfuerzos y esmoliciones, una tradición secular que sigue gociando de bona salú gracies a miles de cotidianos xestos de compromisu. 

 

Ensin ánimu d'alimentar dengún discutiniu y cola única intención de defender llexítimamente la nuesa sidre, ¡entá nun sé de qué, nin de quién!, dexo apurrir delles cites y fechos hestóricos que considero estenen dalgunes de les duldes que llexen estos díes nel aire. Duldes qu'aprucen dacuando y puen ser consecuencia d'una escasa bibliografía sidrera asturiana, más abondosa en tópicos y costumismu qu'en respuestes encontaes sobre cuestiones básiques.

 

Ye recurrente mentar la famosa cita de Estrabón (40 a. de C.), el conocíu xeógrafu de Amasia que documentaba conquistes y andances del Imperiu romanu, que al referise a los usos y a les costumes de los ástures señala: «Zytho etiam utuntur, vini parum habent» (tamién consumen «zytho», pos tienen pocu vinu). Si a esti testimoniu amestamos el de Plinio aludiendo a la bayura y variedá de les mazanes, podemos deducir, nesa dirección apunten dellos investigadores, qu'el «zytho» sedría'l precursor de l'actual sidre. Siquier asina lo considera A. Pannier, al afirmar que «enantes de Marcial, España y la Celtiberia producíen una gran cantidá de mazanes y, poro, fabricaben sidre, anque lo denominaren col nome que los romanos aplicaben indistintamente a toles bébores lleldaes». Ainda asina, lo prudente ye tomar esta vía con tolos precuros.

 

La hestórica bayura y la diversidá de mazanes sidreres n'Asturies son un de los argumentos más elocuentes a la de documentar y xustificar l'espardimientu del cultivu al restu del Arcu Atlánticu. La esistencia de más de 2.500 variedaes de mazana, d'acordies con espertos, y la certidume de disponer anguañu d'unes 500 variedaes autóctones, convenientemente clasificaes y estudiaes, nel Bancu Nacional de Xermoplasma con see nes istalaciones del Serida (Villaviciosa), encontien una clara primacía nel asuntu. De la mesma, ye de xusticia reconocer l'importante papel desendolcáu poles flotes vasques, les sos antigües llínies de cabotaxe qu'enxareyaben puertos del País Vascu coles correspondientes ciudaes y villes bretones y normandes. Dichu fluxu comercial foi fundamental pa la esportación de llantones de pumar, dando orixe a variedaes rebautizaes qu'agora gocien de carta de natura francesa.

 

Tornando a la secuencia hestórica y tomando comu referencia los primeros testimonios inequívocos d'actividá o comerciu sidreru, convien invocar a autores y espublizaciones de reconocía solvencia, primero que dexamos llevar por gurús» de la gastronomía, más prósimos a la cultura del «curtia y pega» o al siempres tentador «poderosu caballeru ye don Dineru». Asina procede invocar al documentu que munchos consideren inicial nel periplu sidreru asturianu: l'acta fundacional del monesteriu de Santa María La Real de Obona (Tinéu), nel añu 780, onde s’ordena que, si fuera posible, «sicere si potest esse», déase sidre a los siervos que van a la serna. De magar d'esa fecha son numberosos los documentos esistentes y de los que tenemos certera noticia qu'afiguraben transaciones, testamentos, donaciones, compraventes, ecétera, que'l so oxetu yera la sidre, mazanes, pumaraes o llagares. Ente ellos podemos destacar el Pactu Monásticu de San Vicente, de 25 de ayares de 781, y el Testamentu de Fakilu, el documentu más antiguu del Arquivu Catedraliciu d'Uviéu, de 8 de xunetu de 793.

 

Nel casu del País Vascu, Severu d'Aguirre de Miramón y Elósegui, noble, inxenieru de montes y llagareru vascu, na so obra «Fabricación de la sidre nes Provincies Vascongaes y el so meyoramientu» (1882), afirma: «El documentu de fecha más remota, de que tenemos noticia, ye'l diploma del rei don Sancho'l Mayor de Navarra, de 17 d'abril de 1014, pol cual otorga una donación al monesteriu de Leire, entós catedral de Pamplona: d'esta donación fai méritu nel Diccionariu Xeográficu Hestóricu d'España, escritu pola Real Academia. Traducíu'l diploma no bastante a esti asuntu diz lo que sigue: "Damos y ufiertamos? nos términos de Hernani a la vera la mar un monesteriu que se diz de San Sebastián? coles tierres, mazanales, pesqueres marítimes, ecétera"». El mesmu puntu de referencia hestóricu que siñala José Uría Irastorza na so obra «La sidre» (1987). Más apocayá Antxon Aguirre Sorondo, nel so llibru «La sidre. Sagardoa» (1996), recueye: «? Paez ser qu'Asturies y Euskal Herria fueron los llugares de la Península onde s'empecipió la esplotación masiva de el pumar». Nel mesmu capítulu da cuenta del asientu llegal d'una donación de «pomamares» na villa de Estavillo, incluyía nel Cartulariu de San Millán de la Cogolla y datada nel 871. El mesmu autor documenta’l primer testimoniu alusivu a sidre vasco, con fecha de 14 de febreru de 1342, emitíu dende Burgos por Alfonso XI, amparando «el drechu de los vecinos de Mondragón pa vender llibremente vinu y sidre d'acarretu, na so casa y ensin cargues impositives».

 

A los hestoriaores queda'l resolver esti tipu de cuestiones y por ello confío refundie más lluz al respeutive la prósima espublización de la tesis doctoral del investigador llavianés Luis Benito García, al igual que seguro va asoceder con otros trabayos del mesmu autor que vien impulsando l'Asociación de Llagareros d'Asturies.

 

Yá pa rematar con estos apuntes sidreros y fuxendo de cualisquier triba de xovinismu o autocomplacencia, creo oportunu citar dos testimonios recién d'espertos estranxeros, llibres de tou barruntu, que sopesen la importancia de la nuesa sidre y la so cultura. La reconocía escritora francesa Maguelonne Toussaint-Samat afirma nel so llibru «Historia natural y moral de l'alimentación», refiriéndose a la sidre: «... Pero la meyor de toes, dende va quince sieglos, sigue siendo la sidre española de les Asturies». Pela so parte, Dave Matthews, espertu en sidre, presidente de l'Asociación Galesa d'Ellaboradores de Sidre y Perada, afirma nel llibru «Cider»: «Asturies ye una pintoresca rexón ensin esplotar, con montes, mariña y la cultura sidrera más fuerte de cualquier llugar del mundu».

Escribir un comentariu


Códigu de segurida
Refescar

PREMIOS SISGA '14

Banner

CHIGRE ENCAMENTÁU

Banner

PLATU ENCAMENTÁU

Banner
You are here Home
RSS