Inicio > Sin categoría > Diez años de Wiidra
Sin categoría

Diez años de Wiidra

El primer echaor virtual revolucionó’l mundiu los videoxuegos en 2007.

LA SIDRA.- El xugaor sostien n’una man una réplica d’una botella sidre y, na otra, un vasu. Los sos movimientos son reflexaos na pantalla. L’oxetivu ye echar la sidre nel vasu y el pagu, beber sidre real si lo llogres.

El 24 de payares de 2007 presentóse esti xuegu de la man de la teunoloxía de la consola Wii y la Fundación CTIC (Centru Teunolóxicu de la Información y la Comunicación). El so nome, Wiidra (Wii+sidra) describía un simulador d’echáu virtual y foi presentáu na feria Tecnimap cellebráu en Xixón aquel mesmu añu.

Diego Martínez, ún de los téunicos que participó nel proyeutu desplicaba qu’inclusive’l mandu cimblaba pa faelo más real y podía sentise’l ruiu de la sidre al cutir el vasu.

Lo bramente curioso d’esti sistema yera que se coneutaba a un echaor llétricu al traviés d’un puertu USB, que faía qu’ésti funcionara cuando ún llograba echar bien la sidre, lo que dexaba esfrutar doblemente de la esperiencia.

Esti branu, diez años dempués, esti echáu virtual pudo tornar a realizase mientres la Fiesta de la Sidra de Xixón n’una actividá entamada pol Conseyu Regulador “Sidre d’Asturies”. Claro que, nesta ocasión, fízose por aciu gafes de realidá virtual y nun había botella, nin vasu, nin muncho menos, sidre.

Ana María Viciosa
http://www.lasidra.as

Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d’inglés, guía ya intérprete y traductora. Ye una gran aficionada a la sidre y al bon xintar.