Con una produición del 12% de l’asturiana el gobiernu vascu invierte más na promoción de la so sidre, que’l “Principado” nos 11 productos con DO, incluyía la sidre. “El gobiernu tendría de dexase orientar y rializar un plan de promoción”, señala Carmen Fernández

LA SIDRA.- La diputada de FORO y vocera de Desendocu Rural y Recursos Naturales na Xunta Xeneral, Carmen Fernández, manifestó en rueda informativa la so “esmolición poles noticies apaecíes na prensa rexonal al respective de cómo ta enraigonando la sidre vasco n'Estaos Xuníos, en desterciu de la sidre asturiano. Fueron los mesmos llagareros asturianos los que, tres la so visita a esti país, comunicaron cómo a la sidre asturiano atribúise-y la meyor calidá y sicasí ye menos conocida”, polo qu'amestó que “siguen sonando les allarmes, dientru y fora d'Asturies, pola falta de sofitu y promoción del Gobiernu de Javier Fernández a la sidre asturiano que pierde mercaos y prestixu. Fernández recordó qu'en payares del pasáu añu aprobóse na Xunta Xeneral una Proposición Non de Llei de FORO na que se pidía al gobiernu, ente otres coses, un plan pa la so promoción cofinanciada coles empreses y les asociaciones del seutor públicu. “La propuesta aprebóse por unanimidá, pero una vegada más nun sirvió pa sensibilizar al Gobiernu, que tien de dexase orientar y rializar un plan de promoción de la sidre pa ganar la batalla de la competencia fora del Principado y nun perdela n’Asturies”.

Carmen Fernández reflexó que “el Gobiernu respondió a FORO sobro'l cumplimientu del alcuerdu plenariu basando'l so supuestu acatamientu nuna campaña conxunta sobro los Alimentos del Paradisu rializada n'avientu del añu pasáu con una inversión de 43.709.43 euros, basada na distribución d'un folletu al traviés de la prensa rexonal, en cuatro grandes supermercaos y cuñes de 20 segundos en radios rexonales. Esta campaña nun foi pa promocionar la sidre como nós esiximos, si non pa tolos productos con denominación d'orixe, devaluando'l protagonismu necesariu a la sidre asturiano” dixo y amestó: “Llama l'atención como otres Comunidaes Autónomes como'l País Vascu, con menos tradición ya inferior calidá de la so sidre que la ellaborada con mazana asturiana tán demostrándomos que la sidre ta en puxanza, que tien un gran mercáu potencial entá ensin esplorar y que merez sumar el sofitu istitucional al que rializa'l mesmu seutor; por ello llancen de cutio campañes de promoción pa la so sidre y nesti sen hai de siñalar que los vascos inverten en campañes de promoción de la so sidre lo que n’Asturies gasten pa los 11 productos con denominación d'orixe” señaló Fernández faciendo referencia al pliegu pa la contratación de la campaña de comunicación y promoción de la sidre natural d'Euskadi'l pasáu 21 de marzu de 2017, con un presupuestu de 50.000 € ensin incluyir l’IVA. Con esti datu Carmen Fernández resaltó que “los vascos inverten en campañes de promoción de la so sidre más  que n'Asturies pa los 11 productos con denominación d'orixe”.

duque_peq3.jpg

01712990
Güey / Today
Ayeri / Yesterday
Nesta Selmana /This Week
Na Caber Selmana /Last Week
Nesti Mes /This Month
Nel Caber Mes /Last Month
5125
7420
18820
653937
164557
399506