L’Allume continúa cola so campaña de crowdfunding y asoleya un vídiu del míticu personaxe.

VER VIDIU

LA SIDRA.- L’Allume sigue cola so campaña de crowdfunding pa facer sidre y cola fin de dar un nueu emburrión a la iniciativa compartió en youtube un vídiu n’onde Conan, el míticu personaxe encarnáu por Arnold Schwarzenegger, llama n’asturianu a la participación de los ciudadanos pa poder financiar la siguiente produición.

 

“Agora qu’entama la collecha de la mazana 2016 pedimos la collaboración pa mercar le mazanes que necesitamos pa facer esa pipa de unos 11.500 ltrs. La idega ye que s’apadrinen sacos de mazanes, pumares o pumaraes y se participe en tol procesu d´ellaboración de la sidre fasta que na primavera de 2017 parte d’ella torne a los sos padrinos, que van poder prebar asina la sidre fecho coles mazanes apadrinaes” siñalaron dende la cooperativa a esta espublización recientemente.  Asina ”Puen apadrinase sacos de mazanes y pumares; y los precios van dende los 5 fasta los 2.000 euros. Tola información pa facelo tá equí: https://as.goteo.org/project/apadrinal-to-pumar-apadrina-tu-manzano

Hai delles formes de consiguir les recompenses dempués de apadrinar los pumares. Dalgunes son en sidre, bien en caxes de 12 botelles o nos estuches de botelles y un vasu. Pero tamién puen algamase otru tipo de coses como espiches, camisetes o visites al llagar. Amás esta ye una bona manera de sufitar al campu asturianu. “Llevamos ya dos años qu’amás de nes Cuenques Mineres del Nalón y del Caudal garramos mazana tamién na marina –Villaviciosa, Xixón– y en Prubaza” detallan en L’Allume.