La Ballera foi ún de los llugares onde se rodó'l tan esperáu comercial...

LA SIDRA.- Foi entesdayeri cuando se llanzó n'horariu prime time'l tan esperáu anunciu de la llotería pa estes navidaes. Anque yá se venía falando d'ello en dellos medios de comunicación y nes redes sociales, pa munchos foi una sospresa que tuviera grabáu en Asturies. En concretu, les llocalizaciones tuvieron en Tazones, Villaviciosa y Llastres. Nuna de les partes del anunciu vese que Doña Carmina –la protagonista– allega al pie de la so familia y amigos a cellebrar que –según creye ella– ganó'l gordu. El chigre nun ye nin más nin menos que La Ballera en Villaviciosa, un establecimientu míticu de La Villa y que s'estrema por cuntar con bien bonos palos de sidre. De fechu Guti, quien la rexenta, ye y foi xuráu de sidre n’estgremaso concursos del nuesu país.

Nel spot vese que los que festexen –supuestamente– ganar el premiu, brinden con una bébora esplumoso. Nun s'esclaria si ye sidre o si ye cava. Pero lo que sí s'aprecia ye que ye una sidrería tradicional. Güei mesmo, nel programa de AR, falar del comercial. Ana Rosa Quintana dixo a l'audiencia: “L'anunciu ta fechu nuna sidrería. Hai que brindar con sidre, ta bien bona” y otru de los sos collaboradores apuntó: “la natural ta bien rica,  cuantimás bien echada”.

El pasáu 4 de payares la Xunta Xeneral del Principáu aprebaba por unanimidá una Proposición Non de Llei, concebida por Foro Asturies, na que s'encamentaba al Gobiernu asturianu a promocionar el consumu de sidre. Ún de los puntos qu'incluyía la iniciativa yera que tanto la RTPA como RTVE tuvieren un Manual d'Estilu sobre bébores tradicionales paque nun esistiera una publicidá tapada” como por casu, pue asoceder, col cava. Siquier, puede dicise que nesti postrer anunciu de la llotería nun s’esplicita’l tipu de bébora col que brinden. Anque eso sí, la gran mayoría del públicu señala que, si la xente ta nuna sidrería, pos lo más probable ye que beban sidre esplumoso. ¿Tamos ciertos de qu'asina asocede siempres?