Los participantes internacionales del VI SISGA van recibir un cursu d'echáu'l xueves 29 nel llagar, y van conocer de primer man el procesu d'ellaboración.

Mañana vienres 30 el xuráu internacional va axuntase y va fallar los premios SISGA’16 nel Llagar Castañón; la semeya de familia con tolos llagareros va ser a les 21:00 hores en Somió Park, darréu va cellebrase la esperada Cena Gala.

LA SIDRA.- Escomiencen les actividaes del VI SISGA –Salón Internacional de les Sidres de Gala–. Güei xueves 29 de setiembre los llagareros internacionales que participen nel alcuentru, y que va durar fasta'l domingu 2, van visitar el Llagar JR en L’Altu l’Infanzón a les 18:00 hores. Ende van recibir un cursu d’echáu per parte de la varies vegaes campiona Loreto García; y van conocer el procesu d'ellaboración. Darréu, a les 20:00 hores, van treslladase al Barriu de la Sidre pa vivir la cultura sidrera xixonesa.

 

 

 

Les actividaes del vienres 30 setiembre van escomenzar nel Llagar Castañón pela mañana. Un referente nel mundiu de la sidre con años de tradición na ellaboración de la nuesa bébora por escelencia. Ente toneles y pegollos, duernos y mayos, el xuráu internacional tastiará toles sidres presentaes y va fallar cuáles son les meyores de ca categoría: de nueva espresión, esplumoses –brut, dulce, semiseca y rosada–, perea, de xelu, auguardiente de sidre, llicor de sidre, les que se presenten en formatu d'un terciu, la sidre más orixinal y la vencedora del grupu internacional. Pela nueche va cellebrase la Cena Gala en Somió Park na que se van harmonizar estramaes tribes de sidre con variaes propuestes gastronómiques. La semeya de familia con tolos llagareros participantes ta proyeutada pa les 21:00 hores.

El sábadu 1 de setiembre va tener llugar la Tastia Abierta al públicu en La Colexata de San Xuan Bautista. Va escomenzar a les 12:00 y va concluyir a les 21:00 hores. Ye una cita imprescindible pa tolos que deseyen conocer la gran variedá de sidres que s'ellaboren n'Europa, una y bones dengún otru eventu gastronómicu del Estáu español axunta a tantos productores d'esti tipu de bébora. 

El SISGA’16 presllará la so sesta edición cola xornada de sumilleres el vienres 2 de setiembre qu'esti añu rializaráse per cuarta ocasión. El llugar onde se va llevar a cabu va ser nel Llagar-Restorán El Duque allugáu en Castiello Bernueces, Xixón. Va ser el colofón d'una intensa fin de selmana nel que se conocerán les meyores sidres qu'anguañu tán asitiaes nos niveles más altos del mercáu internacional. D'ende qu'esti alcuentru seya de gran aprovechamientu pa los sumilleres y llagareros profesionales. Un espaciu nel que van compartir valoraciones, analis, crítiques y conocencies sobre la sidre, amás de les sos percepción, visión y filosofía sobro la cultura sidrera de caún de los sos llugares de procedencia.

duque_peq3.jpg

01745530
Güey / Today
Ayeri / Yesterday
Nesta Selmana /This Week
Na Caber Selmana /Last Week
Nesti Mes /This Month
Nel Caber Mes /Last Month
5497
7826
51360
653937
197097
399506