Va ser el xueves 6 d'abril a les 11:00 hores na Casa la Palmera en Xixón

LA SIDRA.- El xueves 6 d'abril va tener llugar en La Casa de la Palmera la presentación de la VIII edición de la Primera Sidre L’Añu –PSLA–, declarada d'Arraigu Social pol Conceyu de Xixón. Escomenzará a les 11:00 hores y nella desplicaránse detalladamente les actividaes culturales, esportives y gastronómiques que van tener llugar los díis 13, 14, 15 y 16 d'abril nel Muséu del Pueblu d'Asturies en Xixón. A la fin del actu va agasayase a los miembros de la prensa con unos culinos del llagar Buznego, cuya sidre foi la ganaora de la Meyor Primer Sidre L’Añu y que por tantu convirtióse na oficial de la PSLA.

Na presentación van intervenir: Carme Pérez de la Fundación Asturies XXI; Falo Nosti, responsable de les actividaes d'artesanía, mayada y animación infantil y Rafael Fernández, del llagar Buznego. Al actu allegaráse tamién Teresa Sánchez, direutora del Teatru Xovellanos en representación de Divertia.

 

El xueves 12 d'abril a les 13:00 hores va tener llugar la naguración de la Primer Sidre L'Añu na que se va rializar un homenaxe al apocayá fináu Constantino Ovín de la Vega, conocíu nel mundiu sidreru como Tino'l de La Barraca, que revolucionó'l métodu d'echar la sidre y foi'l responsable d'aniciar una riestra de normes que rixeron el concursu d'echaores d'Asturies. Gracies a elli tenemos el llamáu “Decálogu del escanciador”. Al homenaxe asistirá representación de la familia. Tamién van participar los propietarios del llagar Buznego y miembros de les distintes confraderíes gastronómiques asturianes. El campieón echaor de sidre 2016, Salvador Ondó, va ser quien eche'l culín nagural.

La entrada va costar nuevamente 5 euros y podrá tastiase la sidre de más de 70 llagares. Como novedá esti añu va haber una zona acutada especialmente pa mascotes y va realizase una collaboración con ‘30 díis en bici’. Dicha asociación va llevar a cabu un percorríu pela ciudá'l domingu 16 d'abril que va terminar nel Muséu del Pueblu d’Asturies. De manera que los sos miembros van poder entrar gratuitamente a la PSLA. Coles mesmes amestámosmos a la so reivindicación y por esti motivu toles demás presones que lleven la so bicicleta van poder aportar igualmente de baldre esi mesmu domingu.  

Y como n'años anteriores, na PSLA va haber actividaes pa toles edaes y va ufiertase una notable ufierta cultural, llúdica y gastronómica con esibiciones, talleres, tasties guiaes, cocina en vivu, música y baille'l país, esportes tradicionales y amuesa d'artesanía en vivu. Un añu más pondráse especial atención a los más piqueños yá que se proyeutó un ampliu abanicu d'actividaes alrodiu la nuesa bébora tradicional pa que los neños depriendan, y sobro too, espardan somorguiaos na cultura sidrera. Tampoco nun va faltar sidre'l duernu y ensin alcol, pa que tol públicu pueda esfrutar al másimu. Ún de los principales oxetivos de la Fundación Asturies XXI ye qu'esti eventu seya familiar, inclusivu pa tolos colleutivos y que los asistentes conozan y esfruten d'una auténtica “espicha de prau”.

Cola Primer Sidre L'Añu, eventu entamáu pola revista LA SIDRA y la Fundación Asturies XXI, empecípiase la temporada sidrera asturiana, siendo yá un alcuentru de referencia onde cultura, ociu, tradición y gastronomía van de la man. Nelli, recupérase la tradición de les espiches de Selmana Santa y del consumu de la sidre nuevo y ensin trasegar. Pa más información puede visitase la páxina ueb: www.lasidra.as; y les redes sociales: https://www.facebook.com/lasidrainfo y revistalasidra en Twitter.

Más información y entrevistes: estibalizurquiolagmail.com / 669 380 723

duque_peq3.jpg

01706453
Güey / Today
Ayeri / Yesterday
Nesta Selmana /This Week
Na Caber Selmana /Last Week
Nesti Mes /This Month
Nel Caber Mes /Last Month
6008
6275
12283
653937
158020
399506