Foi otru de los llamaos "productos nuevos" presentaos nel Salón de Gourmets.

LA SIDRA.- Anque la sidre de fueu quebequés tevo la so apaición mediática fai un par d'años, esti productu foi ún de los que más llamaron l'atención a los especialistes nesta triba de bébores qu'acudieren a Salón de Gourmets realizáu la selmana pasada nel IFEMA de Madrid. Sigún los espertos esta sidre de fuéu tuvo los sos entamos metanes de los años noventa nel país norteamericanu y anguañu prodúcense alrodiu de milenta botelles al añu.

"Nacía igualmente en Quebec y con Denominación d'Orixe dende 2012, la sidre de fuéu ellabórase mediante una concentración d'arumes más intensa, evaporando l'augua por ebullición. Tres esti procesu, queda un 20 % del llíquidu inicial  que se formienta a perbaxes temperatures cola aída de llevaures. Al cabu de varies selmanes avieyase en barrica carbayu. Son precisos alrodiu de 9 kilos de mazana pa ellaborar una botella de 375 ml. La so tonalidá ye ámbare y rellumante, tien gran complexidá arumática: carambelu, compota, nueces o naranxa, asina como un altu frescor y un puntu d'acidez que la fai única. Al empar que la sidre de xelu, resulta perafayaíza p'acompangar quesos o, xelaos cremosos o simplemente pa degustala solo como aperitivu" siñalaron los sos distribuidores nel Salón.

Cellebraráse'l prósimu 13 de mayu y sedrá la Fiesta de la Sidre más ocidental del país.

LA SIDRA.- Esta fiesta de la sidre entamada pola Comisión de Fiestes de Piantón, ufre botella sidre, vasu xerigrafíau comemorativu de la fiesta y ración d'empanada de chorizu y panceta, o empanada de bonitu y chorizu a la sidre, por 10 €, cola posibilidá de tomar tanto la sidre como la xinta per separtao.

El chigre llévalu la propia comisión, y anuncien precios populares.

Per agora trátase de la fiesta de la sidre más ocidental del país que respuende a una ca vegada mayor presencia de la nuesa bébora tradicional nesa fastera d'Asturies, na que l'actividá del llagar Solleiro -Taramundi- costitúi un dinamizaor de primer orde.

Cellebraráse'l prósimu 13 de mayu na Plaza de Piantón, cuntando cola actuación de Disco Movil Blanco y Negro. 

Sidre de 5 llagares y xinta tradicional pa esta fin de selmana.

LA SIDRA.- La banda gaites Ocidente entama pa esta fina de selmana la II Fiesta de la Sidre pa recladar fondos pal Festival Intercélticu d’Ocidente (Fido) que va yá pola so 21 edición.

Esti añu, amás de la sidre de Taramundi, Solleiro, tamién cuntarán con sidre Trabanco, Arbesú, Gallu Pintu y Zythos, y pa xintar rapón y bollos preñaos. La ufierta consiste en vasu serigrafiáu del Fido y seyes culinos por 4 euros.

Esta edición foi la más activa tocántenes a degustaciones, concursos y tasties.

LA SIDRA.- Salón de Gourmets cerró les sos puertes y los sos entamaores afirmen que foi “la meyor edición”. “Con 4 pabellones, 1.630 espositores, 40.000 productos, 1.300 novedaes y 93.346 visitantes profesionales, 2017 va ser recordáu como l'añu del ésitu gastronómicu” despliquen. P’Asturies tamién va ser una feria pa recordar por dellos factores.  Ún d'ellos ye que per primer vegada realizóse nel escenariu principal un concursu a nivel estatal entamáu por Asturies como lo foi'l concursu “A la gueta del meyor cachopu con IXP Tenral asturiana”, lo qu'atraxo l'atención de críticos, prensa y xefs de toes partes del territoriu español; amás de que se cuntó cola presencia de la restauración asturiana como Casa Eutimio –cachopu ganador–, Mesón asador Eduardo –segundu llugar–, La Talamera –tercer puestu–, el Llar de Viri, Les Tables del Campillín, La Mar y Morena, El Ñëru, La Bolera y Casa Cortina.

Canciar y tocar la gaita sigue tando prohibío nos chigres asturianos, salvo que se dean d’alta como tablaos flamencos.

LA SIDRA.- El “Principado” perafítase na so llei d’espeutáculos públicos que prohibe que nos chigres asturianos se dea la música en direutu, ello ye, el tradicional canciar y tocar la gaita, anque da la posibilidá de que puean faelo si se dan d’alta como tablaos flamencos, esceición que recueye la mencionada llei del "Principado", de xuru qu’un calcu de la que-yos mandaren redautada direutamente dende Madrid, dao que n’Asturies, fasta agora, nun esiste dengún establecimientu d’eses carauterístiques.

Entamada pol colleutivu Entaína, cellebraráse del 5 al 7 de mayu, y cuntará con un concursu de sidre casero, col sofitu de l’Asociación pal Fomentu de la Sidre Casero.

 

LA SIDRA.- Parón aparte pola falta de sofitu municipal, esta ye la 20 edición d’esta folixa, referencial nel oriente asturianu, y na que ca vegada ta dándose-y más puxu a la sidre casero, de tala miente que dichu colleutivu non solo convoca’l Concursu de Sidre Casero valederu pal campionatu nacional que se celebrará en Villaviciosa colos 3 primeros clasificaos, sinon qu’ellaborarán un inventariu con tolos llagares del conceyu incluyendo semeyes y una piqueña hestoria sobro los sos anicios, un trabayu de documentación indispensable n’Asturies, y tovía por facer.

Una vuelta más, la llexislación española recurtia les posibilidaes de desendolcu a los llagares asturianos.

LA SIDRA.- Pesia que la sidre de pera ye un productu tradicional asturianu, conocíu con esi nome dende siempres, la llexislación española -tan vinatera como ignorante de lo que ye’l mundiu de la sidre- esclúi nel so rial decretu aprebáu en febreru pol Ministeriu d’Agricultura, la categoría de sidre de pera, colo qu’esa denominación pasa a ser illegal, ya impide la comercialización de la sidre de pera col nome que-y ye propiu.

N’Asturies, onde como dicíemos nun entamu, la sidre de pera ye un productu tan tradicional y hestóricu como la de sidre de mazana, por más que la so produición y consumu se viere peramenorgáu nos tiempos caberos, namás el llagar Viuda de Angelón comercializaba esi productu -dende 2011-, y agora, por mor d’esta llexislación española, vióse obligáu a aparar la fabricación y distribuición d’esta bébora, anque les tiendes y chigres qu’entá la tean puen siguir vendiéndola fasta escosar les esistencies.

duque_peq3.jpg

01745604
Güey / Today
Ayeri / Yesterday
Nesta Selmana /This Week
Na Caber Selmana /Last Week
Nesti Mes /This Month
Nel Caber Mes /Last Month
5571
7826
51434
653937
197171
399506