Inicio > Gastronomía > Arguiñano y la sidre asturiano
GastronomíaTasties

Arguiñano y la sidre asturiano

El popular cocineru d’Antena 3 presentó ayeri una receta típicamente asturiana na que nun faltó la sidre.

LA SIDRA.- Karlos Arguiñano, el cocineru más famosu de la televisión, presentó ayeri una receta asturiana, cebolles rellenes de bonitu, a pidimientu d’un siguidor gallegu del so programa.

Dempués d’allabar les excelencies del nuesu país, ente les que nun faltaron les sos montañes, sableres y praos, centróse na nuesa gastronomía, a la que definió como bien rica y sana, mesma de la xente asturiano, xente con ganes de xintar.

Na receta nun faltó la sidre como un de los ingredientes principales y ello dio pie a que’l cocineru desplicara una anéudota cola sidre asturiano como protagonista.

Gran aficionáu al ciclismu, allegó va años a los llagos de Cuadonga a guardar una de les mítiques etapes de la Vuelta Ciclista a España. Una vegada ellí baxó con un amigu al pueblu y, como elli mesmu cuenta, nun paraben d’ufierta-y culinos de sidre. Tanto foi asina qu’acabaron, tanto él como’l so amigu, faciendo autostop caún nun llau distintu de la carretera, hasta que pasó pellí un amigu periodista que los recoyó y treslladolos al so hotel. Dempués de recordar que nun se debe abusar d’ella, nun faltaron aponderamientos a la nuesa bébora por escelencia.

Arguiñano, que visitó Asturies per primer vegada nun viaxe d’estudios a Ensidesa, alcordábase cómo probó per primer vegada les fabes con amasueles acompangaes con bona sidre de la zona. Nun faltaron nel so programa referencies a lo bien que se come n’Asturies, eso sí, siempres acompangando los platos con rica sidre asturiano.

Ana María Viciosa
http://www.lasidra.as

Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d’inglés, guía ya intérprete y traductora. Ye una gran aficionada a la sidre y al bon xintar.