Inicio > Chigres > Aniversariu de la Sidrería Miravalles
ChigresGastronomíaTasties

Aniversariu de la Sidrería Miravalles

El chigre xixonés cellebró ayeri’l so segundu aniversariu con xamón ibéricu.

LA SIDRA.- La Sidrería-Parrilla Miravalles tien una curtia pero intensa trayeutoria dientru la restauración xixonesa. Asitiada estratéxicamente al llau de la sablera de San Llorienzu, los sos veceros, qu’allaben la so cocina tradicional y la so impecable atención, afirmen sentise como en casa.

El so propietariu, Pepe Crespo, dedicáu dende va dos décades a la hostelería, quinxo estimar l’enfotu de la so vecería demientres estos dos años con un corte de xamón a partir de les 20.00 hores. Ca veceru pudo esfrutar d’una tapa de xamón ibéricu Montenevado cortáu a la manera tradicional, ello ye, a cuchiellu.

Les sos céllebres parrillaes de carne, les sos calderetes de pexe y mariscu y los sos arroces son los meyores reclamos d’esti chigre. Tampoco nun podemos escaecer l’ésitu de los sos cachopos, una de cuyes propuestes resultó finalista nel IV Campeonatu Rexonal de Cachopos y Cachopinos cellebráu esti añu.

El llocal cunta con un ampliu y lluminosu espaciu y con una cenciella pero efeutiva decoración asturiana que convida a tomar unes botelles de sidre Menéndez. Dispon amás d’un comedor con capacidá pa 50 presones, afayaízu pa cellebrar espiches y otros eventos.

Ana María Viciosa
http://www.lasidra.as

Nacía en Xixón en 1973, cursó los estudios de Filoloxía Inglesa en les Universidaes de Uviéu y Bradford (Reinu Xuníu). Trabayó de profesora d’inglés, guía ya intérprete y traductora. Ye una gran aficionada a la sidre y al bon xintar.